Kod Ostrva cvijeća nasukala se jahta

U tjesnacu Ralo u Tivatskom zalivu, između ostrva Sveti Marko i Prevlaka, prošle subote, oko 40 metara od obale, nasukala se motorna jahta „Sunseeker Manhattan 55“, koja plovi pod zastavom SAD. Dužina plovila je 17,2 metara. Brod, koji je plovio od Krtola prema Prevlaci – Ostrvu cvijeća, skrenuo ju u tjesnac Ralo bzinom od šest čvorova i prišao previšee blizu obali Ostrva cvijeća i nasukao se u plićaku.

U momentu nasukanja u plovilu je bilo pet osoba koje nisu povrijeđene. Odmah su evakuisani jer je sa jahte upućen poziv za pomoć koga su istovremeno primile obalne radio stanice u Baru i Dubrovniku.

Pomoć je stigla vrlo brzo iz marine Porto Montenegro, a reagovala je i Uprava pomorske sigurnosti Crne Gore. Akcija spašavanja broda nastavljena je danas jer se sinoć nije mogao izvući sa pješčanog spruda.

U pomoć je stigla i Inspekcija sigurnosti plovidbe, kao i plovila SAR-1 i EKO-1 Uprave pomorske sigurnosti  i upravljanja lukama Crne Gore.

Kako trup nije oštećen nije došlo ni do ekološkog incidenta, odnosno izlivanja u more goriva, nije bilo potrebe ni za intervencijom ekološkog plovila niti postavljanja plutajuće brane.

Iz predostrožnosti danas je iz jahte ispumpano oko 1,5 tona goriva i izvučeni i neki teži djelovi opreme. Sa dolaskom popodnevne plime jahtu je danas oko 16.30 sati odsukao remorker kompanije „Boka Pilot & Tug Service“ iz Bijele, a nakon toga jahta je u teglju prebačena u marinu i brodogradilište „Navar“ u Bonićima.

FOTO: Uprava pomorske sigurnosti i upravljanja lukama