darko sa foto aparatom

Vrcan: Fotografijom protiv siromaštva

„Prošle godine moja izložba u Tivtu je bila posvećena Aziji, a večerašnja je posvećena Africi. Ovo su neke moje impresije sa mog posljednjeg putovanja po Africi“ – rekao je za naš radio umjetnički fotograf Darko Vrcan, čija izložba fotografija „Od Boke do Afrike“ će biti otvorena večeras u 20 sati u galeriji „Buća“ u sklopu „Novembarskih dana“. Izložbu će otvoriti Dubravka Nikčević, sekretarka Sekretarijata za kulturu i društvene djelatnosti.

     „Izložba je podjeljena u tri segmenta: počinje sa fotografijama iz Boke.Boka kao moja vječita inspiracija. Boka je fascinantna i fotogenična. Najviše, po meni, u ranu zoru. Zatim se nastavlja sa afričkim pejzažima, te crno bijelim fotografijama sa afričke ulice i iz afričkih plemena. Afrika je koloritna i različita. Može se doživjeti na puno različitih načina. Ja sam htio da dočaram kontraste. Ima tu i opasnih životinja. Fotografisao sam iz blizine. Foto šop ne koristim. Mislim da nema potreba za to. Ja ne planiram mnogo moja putovanja. Odlučujem impulsivno. Svake godine idem na neki drugi kontinent. Ostala je samo Australija, a i ona je u planu.
Na putovanjima slikam iz različitih uglova. Volim da se stavim u ulogu tzv. malog čovjeka. Putujem sa lokalnim transportima, pokušavam da doživim njihov život onako kako ga oni žive. Ovo je moj doprinos da ne zatvaramo oči pred siromaštvom i pred ljudima koji imaju malo ili ništa. Nego da svi zajedno pokušamo da izgradimo neki ljepši svijet“ – kaže Darko Vrcan.